Organizata UNECS, me mbështetjen e Institutit të Integrimit të ish-të Përndjekurve Politikë, zhvilloi një aktivitet edukativ në Pogradec me nxënësit e gjimnazit “Gjergj Pekmezi”, stafin drejtues të shkollës dhe ish-të përndjekur politikë.

 

Aktiviteti nisi me një vizitë në kompleksin rezidencial të vilave të ish-udhëheqjes komuniste, ku nxënësit u njohën nga afër me privilegjet e elitës së sistemit, në kontrast me jetën në kushte të vështira të qytetarëve gjatë diktaturës. Më pas, në ambientet e Hotel Enkelana, u zhvillua një diskutim i hapur dhe u shfaq një dokumentar i shkurtër mbi persekucionin gjatë regjimit komunist.

 

Diskutimi theksoi rëndësinë e kujtesës historike, respektimit të të drejtave të njeriut dhe forcimit të kulturës demokratike tek brezi i ri.

Ky aktivitet përbën një hap konkret në edukimin qytetar të të rinjve dhe në nderimin e historisë së atyre që përjetuan persekutimin politik.